ਸਤਿੰਦਰ ਸਰਤਾਜ-ਤਿਰਲੋਕ ਜੱਜ ਮਾਮਲੇ 'ਚ ਪ੍ਰੋ: ਅਨੂਪ ਵਿਰਕ ਦੀ ਤੂਤੀ

-ਹਰਮੇਲ ਪਰੀਤ
ਸਤਿੰਦਰ ਸਰਤਾਜ ਵੱਲੋਂ ਆਪਣੇ ਇੱਕ ਗੀਤ ਮਨ ਕੁੰਤੋ ਮੌਲਾ ਵਿਚ ਵੱਖ-ਵੱਖ ਸ਼ਾਇਰਾਂ ਦੇ ਕੁੱਝ ਸ਼ੇਅਰ ਗਾਉਣ ਦਾ ਮਾਮਲਾ ਦਿਨੋ-ਦਿਨ ਤੂਲ ਫੜ੍ਹਦਾ ਜਾ ਰਿਹਾ ਹੈ। ਸ਼ਾਇਰ ਤਿਰਲੋਕ ਜੱਜ ਵੱਲੋਂ ਦੋਸ਼ ਲਾਇਆ ਗਿਆ ਹੈ ਕਿ ਇਸ ਗੀਤ ਵਿਚ ਡਾ : ਸਰਤਾਜ ਨੇ ਉਸ ਦੀ ਇੱਕ ਗ਼ਜ਼ਲ ਦੇ ਕੁੱਝ ਸ਼ੇਅਰ ਬਿਨਾਂ ਸ਼ਾਇਰ ਦਾ ਨਾਂਅ ਲਏ ਗਾਏ ਹਨ। ਇਸ ਸਾਰੇ ਮਾਮਲੇ ਨੂੰ ਲੈ ਕੇ ਪਿਛਲੇ ਕਾਫੀ ਦਿਨਾਂ ਤੋਂ ਇੰਟਰਨੈਟ 'ਤੇ ਖਾਸੀ ਬਹਿਸ ਚੱਲ ਰਹੀ ਹੈ ਤੇ ਹੁਣ ਇਹ ਬਹਿਸ ਅਖ਼ਬਾਰਾਂ ਦੇ ਪੰਨਿਆਂ ਤੱਕ ਆ ਗਈ ਹੈ। ਸ੍ਰੀ ਜੱਜ ਨੇ ਡਾ: ਸਰਤਾਜ ਨੂੰ ਮੁਆਫੀ ਮੰਗਣ ਲਈ 15 ਦਿਨਾਂ ਦੀ ਮੋਹਲਤ ਦਿੱਤੀ ਹੈ।
ਕੇਂਦਰੀ ਪੰਜਾਬੀ ਲੇਖਕ ਸਭਾ ਵੀ ਹੁਣ ਸ੍ਰੀ ਜੱਜ ਦੇ ਹੱਕ ਵਿਚ ਨਿੱਤਰ ਪਈ ਹੈ। ਸਭਾ ਦੇ ਪ੍ਰਧਾਨ ਜਨਾਬ ਪ੍ਰੋ: ਅਨੂਪ ਵਿਰਕ ਨੇ ਸ਼ਾਇਰ ਤਿਰਲੋਕ ਜੱਜ ਦੀ ਨਜ਼ਮ 'ਚੋਂ ਸਰਤਾਜ ਵੱਲੋਂ ਚੋਰੀ ਕੀਤੇ ਗਏ ਸ਼ੇਅਰਾਂ ਦਾ ਗੰਭੀਰ ਨੋਟਿਸ ਲੈਂਦਿਆਂ ਉਨ੍ਹਾਂ ਕਿਹਾ ਕਿ ਜੇਕਰ ਤਿਰਲੋਕ ਜੱਜ ਆਪਣੇ ਸਟੈਂਡ 'ਤੇ ਕਾਇਮ ਰਹਿਣਗੇ ਤਾਂ ਕੇਂਦਰੀ ਪੰਜਾਬੀ ਲੇਖਕ ਸਭਾ ਉਨ੍ਹਾਂ ਦਾ ਡਟ ਕੇ ਸਾਥ ਦੇਵੇਗੀ।
ਇਥੋਂ ਤੱਕ ਮਾਮਲਾ ਸਮਝ ਆਉਂਦਾ ਹੈ। ਪਰ ਹੁਣ ਜਦੋਂ ਡਾ: ਸਤਿੰਦਰ ਅੜਿੱਕੇ ਆਇਆ ਹੈ ਤਾਂ ਡਾ: ਅਨੂਪ ਦਾ ਵੀ ਦਿਲ ਕਰਦਾ ਹੈ ਕਿ ਉਹ ਵੀ ਹੋਰਾਂ ਤੋਂ ਕੁੱਝ ਜ਼ਿਆਦਾ ਬੋਲਣ, ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਹਨ, ਦੂਜਿਆਂ ਤੋਂ ਕੁੱਝ ਵੱਡੀ ਟਿੱਪਣੀ ਤਾਂ ਕਰਨੀ ਹੀ ਪੈਣੀ ਹੈ, ਤਾਂ ਹੀ ਕੋਈ ਧਿਆਨ ਦੇਵੇਗਾ ਉਹਨਾਂ ਦੀ ਗੱਲ ਵੱਲ।
ਪ੍ਰੋ: ਵਿਰਕ ਬਿਨਾਂ ਸ਼ੱਕ ਵਿਦਵਾਨ ਸ਼ਾਇਰ ਹਨ। ਸਾਡੇ ਲਈ ਕਾਬਲ-ਇ-ਇਤਰਾਮ ਹਨ। ਪਰ ਲਗਦਾ ਹੈ ਡਾ: ਸਰਤਾਜ ਦੇ ਗੀਤਾਂ 'ਤੇ ਟਿੱਪਣੀ ਕਰਨ ਲੱਗਿਆਂ ਉਨ੍ਹਾਂ ਦਲੀਲ ਨਾਲੋਂ ਜ਼ਿਆਦਾ ਜਜ਼ਬਾਤ ਤੋਂ ਕੰਮ ਲਿਆ ਹੈ। ਪ੍ਰੋ: ਵਿਰਕ ਆਖਦੇ ਹਨ ਕਿ ਇੱਕ ਪਾਸੇ ਤਾਂ ਸਰਤਾਜ ਵਾਰਿਸ ਸ਼ਾਹ ਵਰਗੇ ਸੂਫੀ ਫਕੀਰ ਵਰਗੇ ਕੱਪੜੇ ਪਾ ਕੇ ਉਨ੍ਹਾਂ ਵਰਗਾ ਭੇਸ ਧਾਰਨ ਕਰ ਰਿਹਾ ਹੈ ਪਰ ਦੂਜੇ ਪਾਸੇ 'ਅੱਧੀ ਕਿੱਕ 'ਤੇ ਸਟਾਟ ਮੇਰਾ ਯਾਮਹਾ, ਹੋਰ ਦੱਸ ਕੀ ਭਾਲਦੀ' ਵਰਗੇ ਗੀਤ ਗਾ ਰਿਹਾ ਹੈ।। ਮੈਨੂੰ ਉਹ ਦੱਸੇ ਕਿ ਅਜਿਹੇ ਗੀਤਾਂ ਦਾ ਸੂਫੀਵਾਦ ਨਾਲ ਕਿੱਥੋਂ ਤੱਕ ਦਾ ਵਾਸਤਾ ਹੈ।।
ਸਮਝ ਤਾਂ ਸਾਨੂੰ ਵੀ ਨਹੀਂ ਆ ਰਹੀ ਕਿ ਪ੍ਰੋ: ਵਿਰਕ ਨੇ ਇਹ ਟਿੱਪਣੀ ਕਰਨ ਤੋਂ ਪਹਿਲਾਂ ਇਸ ਗੀਤ ਨੂੰ ਪੂਰਾ ਸੁਣਨ ਦੀ ਜ਼ਹਿਮਤ ਵੀ ਉਠਾਈ ਹੈ ਕਿ ਨਹੀਂ? ਏਸ ਗੀਤ ਵਿਚ ਅਜਿਹਾ ਕੁੱਝ ਵੀ ਨਹੀਂ ਜਿਹੋ ਜਿਹਾ ਪ੍ਰੋ: ਵਿਰਕ ਨੂੰ ਨਜ਼ਰ ਆਇਆ ਹੈ।
ਸੱਚ ਇਹ ਹੈ ਕਿ ਇਹ ਹਲਕੇ ਫੁਲਕੇ ਅੰਦਾਜ਼ ਵਾਲਾ ਗੀਤ ਜਿੱਥੇ ਚਾਦਰ ਵੇਖ ਕੇ ਪੈਰ ਪਸਾਰਨ ਦਾ ਸੁਨੇਹਾਂ ਦਿੰਦਾ ਹੈ। ਉਹ ਇਹ ਵੀ ਆਖ਼ਦਾ ਹੈ ਜੇਕਰ ਉਹ ਕਿਸੇ ਤਰ੍ਹਾਂ ਕੋਈ ਹੋਰ ਮਹਿੰਗਾ ਮੋਟਰ ਸਾਈਕਲ ਖ਼ਰੀਦ ਵੀ ਲਵੇ ਤਾਂ ਪਰ ਪੈਟਰੋਲ ਕਿੱਥੋਂ ਆਵੇਗਾ? ਪੰਪ ਵਾਲਾ ਕਿਹੜਾ ਉਸਦਾ ਮਾਮਾ ਹੈ? ਡਾ: ਸਰਤਾਜ ਦੇਸ਼ ਦੇ ਦਿਨ ਬਦਲਣ, ਚੰਗੇ ਨੇਤਾਵਾਂ ਦੇ ਆਉਣ ਦੀ ਗੱਲ ਰਾਹੀਂ ਮੌਜੂਦਾ ਗੰਧਲੀ ਸਿਆਸਤ 'ਤੇ ਵੀ ਤਨਜ਼ ਵੀ ਕਰਦੇ ਹਨ। ਪਰ ਅਫਸੋਸ ਪ੍ਰੋ: ਅਨੂਪ ਦਾ ਬਿਆਨ ਸਿਰਫ ਤੇ ਸਿਰਫ ਡਾ: ਸਰਤਾਜ ਨੂੰ ਨਿਸ਼ਾਨਾ ਬਣਾਉਣ ਦੀ ਮਨਸ਼ਾ ਤੋਂ ਹੀ ਪ੍ਰੇਰਤ ਹੈ।